Atzo amaitu zen Durangoko Azokaren 48. edizioa, eta, harekin batera, atzo izan zuen ere azken eguna Landakoenea saioak. Hiru gonbidatu izan ziren hizketan saioan: Alex Sardui Gatibu taldeko abeslaria, Maite Arroitajauregi Mursego taldeko kantaria eta Nerea Mujika Gerediaga elkarteko zuzendaria.
Inaxio Esnaola eta Ane Azkue izan dira Landakoenea saioaren aurkezle, eta BerriaTBko Lara Madinabeitia eta Ander Garcia aritu dira bideogintzan, Hamaika Telebistako bideogileekin batera. Ostegunaz geroztik, saioa egunero zuzenean ikusi ahal izan da BERRIA.INFOn, 12:00etatik 13:00etara, eta ondoren ere ikusgai izan da webgunean.
