Gaur irtengo da kalera Amy Winehouse abeslariak utzitako ondarearen bilduma: Amy Winehouse Lioness: Hidden Treasures. Hamabi abestik osatzen dute diskoa; aurretik ekoitzi gabeko kantuak, hainbat artistaren bertsioak eta abesti berriak bildu dituzte Salaam Remi eta Mark Ronson ekoizleek. Harreman estua izan zuten biek Winehouserekin, eta abeslariaren heriotzaren ondotik «entzutea merezi duen kantuen bilduma» utzi zuela konturatu ziren. Uztailaren 23an hil zen abeslaria, Londresen, Camden Town auzoko etxean.
Argitaratu gabeko hainbat lan jaso dituzte diskoan, Between the Cheats eta Best Friends, esaterako. Berreskuratu dituzten abestien artean daude A Song for You eta Body & Soul. Lehenengoa 2009an grabatu zuen; Body & Soul, berriz, Tony Bennet abeslari estatubatuarrarekin batera kantatu zuen, Bennetek irailean argitaratu zuen diskorako. Winehousek 18 urterekin abestu zuen Antonio Carlos Jobimen The Girl from Ipanema ere sartu dute bilduman. Wake up alone, Valerie eta Halftime dira beste abestietako batzuk.
Diskoarekin lortzen dituzten irabaziak Amy Winehouse Fundaziora bideratuko dituzte. Alkoholarekin eta drogekin arazoak dituzten gazteei laguntzeko sortu zuten fundazioa.
Bi disko arrakastatsu
Ibilbide labur baina oparoa izan zuen abeslariak. Bi disko kaleratu zituen, eta nazioarteko musika zerrenden lehen postuetara heldu zen biekin. 2003an plazaratu zuen lehena, Frank. Milioi eta erdi disko saldu zituen harekin; sariak eta mundu osoan emandako kontzertuak heldu ziren atzetik. 2006an kaleratu zuen bigarren lana, Back to Black. Gorenera eraman zuen hark, hamabost milioi disko salduta. 2007an urteko diskorik onena aukeratu zuten, eta 2008an, bost Grammy sari irabazi zituen. Horrela, sariketa horretan bost sari lortzen zituen lehen abeslari ingelesa bihurtu zen Winehouse.
Amy Winehouseren disko bat kaleratuko dute gaur, hainbat lan berrirekin
Uztailean hil zen abeslaria, eta orain haren kantu berriak, bertsioak eta ekoitzi gabeko abestiak bildu dituzte
Iruzkinak
Ez dago iruzkinik
Ordenatu
