'Art Brut, Sormena eta eldarnioa' erakusketa ireki dute Kursaalen

Art Brut, Sormena eta eldarnioa erakusketa ireki dute gaur Donostiako Kursaaleko Kubo aretoan, eta otsailaren 27ra arte egongo da hura ikusteko aukera. Jean Dubuffetek (1901-1985) 40ko hamarkadan asmatutako terminoa da Art Brut. Artearen alor ofizialetik kanpo sortutako artelanak izendatzeko erabili zuen. Art Brut joeraren barruan sartzen direnak gaixo psikologikoak dira, gerra presoak, naturaz gaindiko munduarekin lotura dutenak... Baina hori guztiaren gainetik artistak dira.

Hamabi artistaren obrek betetzen dute Kursaaleko Kubo aretoa. Aloise Corbaz (Suitza, 1886-1964), Carlo Zinelli (Italia, 1916-1974), Madge Gill (Ingalaterra, 1882-1961), Laure Pigeon (Frantzia, 1882-1965) eta Adolf Wolfi (Alemania, 1864-1930) zendutakoen lanak daude alde batetik, Art Brut joeraren historikotzat jotzen diren egileak. Oraindik bizirik dauden beste sei egile gehiagoren sormenak ere ikus daitezke. Curzio di Giovanni (Italia, 1957), Hoser Hofer (Austria, 1945), Kunizo Matsumoto (Japonia, 1962), Nek Chand (Pakistan, 1924), Reinhold Metz (Alemania, 1942), Eugenio Santoro (Italia, 1920) eta Paul Amar (Frantzia, 1919) dira egile horiek; azkenak Donostiako erakusketan azaldu zuen atzo bere lanaren funtsa.