Aurtengo dFeriak arte diziplinen arteko mugekin jolastea du helburu. Martxoaren 10etik 13ra bitartean, azokak 23 obra eskainiko ditu Donostian, eta horietatik 18 erabateko estreinaldiak izango dira. Guztira 26 konpainiak parte hartuko dute aurtengo azokan, horietatik %53 Euskal Herrikoak.14 antzezlan eta 10 dantzaldi eskainiko dituzte, eta gainontzeko bi ikuskizunetan mota askotako diziplinen nahasketa eskainiko dute. Honakoak dira emanaldi nabarmenenak: Parasite Kolektiboa taldearen Hautsa, Bramant Teatreren Casa de muñecas, Morfeo Teatroren La escuela de los vicios, Tanttaka Antzerkiaren Zazpi aldiz elur, Teatro Paraísoren Erpurutxo eta Aukeran dantza taldearen Geltokia.
Horrekin batera, dFeriak inprobisazioari lekua eskainiko dio. Euskal Aktoreen Batasunaren eskutik, elkar ezagutzen ez duten aktore eta zuzendarien artean hamabi ordu izango dituzte inprobisatutako antzezlana prestatzeko. Emanaldi hau euskara hutsean izango da.
Norka Chiapuso dFeriako zuzendariak azaldu duenez, aurten ere sarrerak merkeago eskainiko dituzte salmentaren lehen egunetan. Hala, otsailaren 16a baino lehen, sarrera orokorrak 6 eurotan salduko dituzte, balio dutenaren erdia, hain zuzen ere.
