Adelina Moyak, Txomin Badiola, Peio Agirrek eta Idoia Zabaletak osatutako aholkulari taldeak Xabier Gantzarainen proiektua aukeratu du Artelekuren koordinazio artistikorako.
Gipuzkoako Foru Aldundiko Kultura zuzendaritzak egindako deialdi publikoaren oinarrietan argitzen zen zentro berriak arte sistemaren barruan bete behar duen funtzioa: eskola esperimental baten lana alegia; hau da, praxi artistikotik abiatutako prestakuntza. Horrela, Santa Teresako egoitzan garatuko den proiektuak Artelekuk sorreran oinarri izan zituen ezaugarriak berreskuratu eta zutabe bihurtuko ditu.
Azkeneko hilabeteetan Donostiako Txomin-Enea auzoko eraikinetik Santa Teresa komentura eraman dituzte Artelekuko material guztiak eta ekainaren erdialdetik martxan da bertan arte fabrika.
Xabier Gantzarain (Azkoitia, 1975) Arte Ederretan lizentziatua da eta arte kritika lanetan ibilia da, besteak beste Egunkaria-n eta Berria-n. Horretaz gain, bi liburu ditu argitaratuak: Van Gogh, bihotzean eguzkia (2002, Txalaparta) eta Epelde, mende baten soinua (2004, Trikitixa Elkartea).
