Babesik gabeko espioia

Hamabost urte, lau pelikula eta beste hainbeste zuzendari. 1996an Brian de Palmak Bruce Gellerek sortu zuen telebista saila arrakastatsua pantaila handira eraman zuenetik, gorabehera ugari izan ditu Mission Impossible sortak. Era berean, frankizia errentagarria dela erakutsi du orain arte izan dituen hiru ataletan. Arrakasta komertzial bera lortu nahi du laugarren honek, Mission Impossible: Ghost Protocol.

Izenburuak aipatzen duen protokolo hori da istorio berriaren ardatz nagusia. Izan ere, Ghost Protocol delakoarekin AEBetako presidenteak espioitza agentzia bertan behera uzteko ahalmena du. Eta halaxe eginen du, Ethan Hunt eta haren laguntzaileak Kremlinen kontrako atentatu saio batean nahastuta agertu ostean. Horren ondorioz, IHF-n lan egiten zuten espioi guztiek beste zeregin batzuetan hasi beharko dute.

Baina Ethan Huntek ez du horren erraz amore eman nahiko. Nagusien babes logistiko eta teknologikorik gabe bada ere, bere jardunean segituko du. Bi helburu nagusi ditu: batetik, dagoen mehatxu nuklearra indargabetzea, eta, bestetik, espioitza agentziaren izen ona errekuperatzea. Bakarrik lan egiten ohituta dago Hunt, baina oraingo honetan berak aukeratu ez duen talde batekin aritu beharko du.

Tom Cruisek egin du berriro Ethan Huntena. Aktore beteranoak jakin izan du 40ko urteetako krisi beldurgarriari aurre egiten, eta, oraindik, haren izena amu ona da jendea aretoetara eramateko. Ez du sekula interpretaziorako bertute handirik izan, baina azken urteotan egin dituen pelikula bakanetan sen komertzial handia erakutsi du, eta hori Hollywoodek beti eskertzen jakin izan du.

Zuzendari lanetan, berriz, Brad Bird dago laugarren Mission Impossible honetan. Aurrekoak de Palma, John Woo eta J.J. Abrams izan ziren. Orain arte Bird animazio generoan aritu da, Pixarren eskutik. Bereak ditu, besteak beste, The Iron Giant, The Incredibles eta Ratatouille

'MISSION IMPOSSIBLE: GHOST PROTOCOL'

Zuzendaria: Brad Bird.

Aktoreak: Tom Cruise, Jeremy Renner, Simon Pegg, Paula Patton, Josh Holloway, Michael Nyqvist, Ving Rhames, Tom Wilkinson.

Herrialdea: AEB.

Urtea: 2011.

Iraupena: 132 minutu.

Estreinaldia:Gaur estreinatuko dute Ipar Euskal Herrian eta ostiralean, Hego Euskal Herrian.