Bakarlari eta taldeentzako lehiaketa antolatu du Jazzaldiak

ZU falta al zara Jaialdian? izeneko lehiaketa antolatu du Donostiako Jazzaldiak. Uztailaren 21eko jazz Band Ballean parte hartu nahi duten bakarlariei eta taldeei zuzenduta dago, profesionalak zein amateurrak izan, eta edozein delarik estiloa edo jatorria. Parte hartzeko, izena eman behar da www.heinekenjazzaldia.com webgunean, uztailaren 14a baino lehen—oinarriak ere han dira—. Herritarrek erabakiko dute nor den irabazlea.

Jaialdiko antolatzaileek egitarauan aurten sartutako berrikuntzetako bat da ZU falta al zara jaialdian? lehiaketa. Bestalde, iaz hasitako kontzertu ezkutuen esperientziari segida emango diote. Aurten, ezagutzen dira kontzertuok eskainiko dituzten taldeen izenak —BO, TriEZ, Thee Brandy Hips, Natahniel Rateliff, Mursego eta MobyDick— , baina agertokia, eguna eta ordua sekretuak izango dira azken unera arte.