Eten bat izan zuen Bertso Egunak 2017an. Aspaldiko urteetan ohitura bihurtua zen ospakizuna Donostian egitea, baina aldaketa bat emateko, ez zen Bertso Egunik izan iaz. 2018koa izan zen molde berriko lehena, Mungian (Bizkaia) egindakoa, eta bide berean sakonduko du aurten ere Bertsozale Elkarteak. Barañainen (Nafarroa) egingo dute bertsolaritzaren jaia, Berso Eskolen Egunarekin batera. Bertako bertso eskolaren eta udalaren laguntza izan dute horretarako. Ez da edonolako edizioa izango 2019koa: mende erdi beteko du Bertso Egunak.
Enkarguz emanaldiarekin ekingo diote egunari, 11:00etan —Andoni Egaña eta Xabi Zabala ditu protagonista—. Poteoa egingo dute jarraian, Aitor Servier, Alaia Martin, Andoni Egaña, Arrate Illaro, Eli Pagola, Gorka Pagonabarraga, Mikel Lasarte, Miren Artetxe, Saioa Alkaiza, Sarai Robles, Unai Iturriaga eta Xabi Igoa bertsolariekin. 15:00etan izango da bazkaria, eta 19:00etan bertso emanaldia, Beñat Gaztelumendi, Julio Soto, Maddalen Arzallus, Maialen Lujanbio eta Xabat Gallatebeitia bertsolariekin. Bertso eskolak gaitzat hartuta, Nerea Ibarzabal bertsolaria eta Edurne Azkarate aurkezlea aritu dira prestaketa lanetan. "Gauean ere izango da jaia nola luzatu", Bertsozale Elkarteak jakinarazi duenez.
Sarrerak salgai daude dagoeneko, www.bertsosarrerak.eus atarian.
