Berri Txarrak taldeak hogei urte beteko ditu aurten, eta hori ospatzeko sortze prozesu berezi batean dago, Gorka Urbizu abeslari eta gitarristak berak adierazi duenez. Martxoan hainbat kantu grabatu zituzten Urbizuk, David Gonzalezek (baxua) eta Galder Izagirrek (bateria) Kalifornian, Ross Robinson ekoizlearekin (Sepultura, Korn, Machine Head, The Cure...), eta gero astebeteko bira bat egin zuten Ameriketako Estatu Batuetan.
Sesio haietan grabatutako kantua da Etsia, eta Badok.info-n dago entzungai atzodanik.
Azken hogei urteotan estudioko zazpi disko kaleratu ditu taldeak —Berri Txarrak (1997), Ikasten (1999), Eskuak / Ukabilak (2001), Libre (2003), Jaio.Musika.Hil (2005), Payola (2009) eta Haria (2011)—, eta zortzigarrena izango da urte amaieran iritsiko dena.
