Bertsoaren sareko telebista

Otsailetik martxan egon arren, gaur aurkeztu du Euskal Herriko Bertsozale Elkarteak bertsoplaza.tv Interneteko ataria. "Elkarteak bertsozale eta profesionalen eskura jartzen duen Internet bidezko telebista da", diote arduradunek, eta "tresna eraginkorra" dela uste dute. Otsailetik hona plaza "fintzen" aritu dira eta orain arte, behintzat, astean 15-20 bideo ipini dituzte sarean. Hedabide horrekin, Interneten zeukaten hutsunea estali dutelakoan daude.

Bertso saioak, elkarrizketak, erreportajeak, berriak, analisiak eta, oro har, bertsoarekin lotura duen materiala aurki daiteke bertan. Eta jendearen parte-hartzea lortu nahi dute. bertsorik gustukoenak bozkatzeko, iruzkinak egiteko, bideoak igotzeko... "Helburu nagusia, bertsozaleak plazako ikusle soil izatea baino, plazako kide izatea da".