Urte askoan elkarrekin lan egindako bi zuzendarik, Asier Altunak eta Telmo Esnalek —besteak beste, Aupa Etxebeste! egin zuten—, bakarkako lan berriak aurkeztuko dituzte Donostiako Zinemaldian. Bertsolari sail ofizialean eskainiko dute, lehiaketatik kanpo, eta Urte berri on, amona! Zabaltegi-Zuzendari Berriak sailean. Azken urteetako bideari jarraituz, euskarazko zinemagintzak lekua izango du aurten ere Donostiako Zinemaldian.
Zinemaldiak sail ofizialeko beste hiru filmen izenburuak ezagutarazi ditu gaur: No habrá paz para los malvados, Enrique Urbizu zuzendari bizkaitarrarena, Los pasos dobles Isaki Lacuesta katalanarena —duela bi urte Los condenados aurkeztu zuen—, eta La voz dormida Benito Zambrano espainiarrarena.
Zabaltegi-Zuzendari Berriak sailean, Esnalen filmaz gain, Ignacio Ferrerasen Arrugas animazioko lana eta Sandra Sanchezen Tralas luces film dokumentala aurkeztuko dituzte, eta Zabaltegi-Bereziak sailean, zazpi lan estreinatuko dituzte: 14 d'abril: Macià contra Companys (Manuel Huerga), Al final del túnel (Eterio Ortega), El cuaderno de barro (Isaki Lacuesta), Extraterrestre (Nacho Vigalondo), Madrid, 1987 (David Trueba), Puzzled Love (Kataluniako Zinema eta Ikus-Entzunezko Goi Eskola) eta Verbo (Eduardo Chapero-Jackson).
