'Amour'
Zuzendaria: Michael Haneke. Aktoreak: Jean-Louis Trintignant, Emmanuelle Riva, Isabelle Huppert, William Shimell, Rita Blanco, Ramon Agirre. Herrialdea: Austria.Urtea: 2012. Iraupena: 127 minutu.Michael Hanekeren azken maisulana Ipar Euskal Herriko aretoetara ailegatu da. Cannesko zinemaldian Urrezko Palmorria irabazi du aurten Amour-ek, eta Donostiako zinemaldian ere kritika ezin hobeak jaso zituen. Oraingoan, zahartzaroaren eta maitasunaren inguruko drama gordina egin du Hanekek. Protagonistak senar-emazte edadetu batzuk dira; Parisen bizi dira, eta musikari erretiratuak dira. Bien alaba haiek zaintzeaz arduratzen da. Baina gaixotasun larri batek bien arteko maitasuna muturreraino eramanen du.
'Hotel Transylvania'
Zuzendaria: Genndy Tartakovsky. Herrialdea: AEB. Urtea: 2012. Iraupena: 91 minutu.Ideia ez da hagitz originala, orain dela urte batzuk Pixar etxeak Monster, Inc. egin baitzuen. Orain, gurean gero eta oihartzun handiago duen Halloweeneko gau inportatua aprobetxatuz, munstroen inguruan animazio filma ailegatu zaigu pantailetara. Mavis Transylvania izeneko luxuzko hotel batean bizi da, eta adin nagusitasunarena ailegatuko da laster, 118 urte betetzean. Hori ospatzeko haren aitak, Drakula kondeak, festa berezi bat prestatu nahiko dio eta familiako munstro lagunak gonbidatuko ditu horretara: Frankenstein, gizon ikusezina, momia... Horiez gain, Mavirekin maiteminduko den gizaki bat ere agertuko da festara.
'Sillent Hill: Revelation 3D'
Zuzendaria: Michael J. Bassett. Aktoreak: Adelaide Clemens, Kit Harington, Sean Bean, Carrie-Anne Moss, Malcolm McDowell, Radha Mitchell, Deborah Kara Unger. Herrialdea: AEB. Urtea: 2012. Iraupena: 102 minutu.Sillent Hill izeneko bideojoko ezagunaren bertsio zinematografikoa bigarren atalera ailegatu da. Munstroak eta terrorea uztartzen ditu jarraitzaile ugari dituen sail honek. Bigarren pelikula honetan, Heather Masonek 18 urte beteko ditu, eta aitaren bila abiatzea erabakiko du. Amesgaiztoek ez diote bakerik emanen, horiei jarraikiz lainoaren hirira ailegatuko da, eta han Sillent Hilleko sekretua ezagutuko du. Izenburuak argi uzten duen moduan, sustoak hiru dimentsiotan jasotzeko aukera ematen du filmak.
