Donostiako Zinemaldiak gainditu du ekuatorea, eta gaur La voz dormida eta 11 Flowers filmak aurkeztu dituzte sail ofizialean. Lehenengoan Espainiako Gerra ostea landu du Benito Zambrano zuzendariak. Maria Leon aktorea Zilarrezko Maskorra jasotzeko hautagai nagusietako bat da.
Bigarrengoan, berriz, Wang Xiaoshuai zuzendariak Txinako Iraultza Kulturala hartzen du, eta nekazal giroko lau haurren ikuspuntua hartuta modu nahiko neutralean azaltzen du. Sangue do meu sangue filma ere ikusgai da gaur, Joao Canijo zuzendariarena.
Zinemira jaialdia
Gainerakoan gaur euskal zinemaren eguna izango da, Zinemira jaialdia egingo baitute. Aurten, zazpi film aurkeztu dituzte sail horretan, eta horietatik bat emango dute gaur Viktoria Eugenia antzokian, Euskal Zinemaren Galan: Imanol Rayoren Bi anai, zeina atzo estreinatu zen.
20:30ean hasiko da ekitaldia, eta Bernardo Atxagaren eleberrian oinarritutako film luze horretaz gain, Gregorio Muroren Zeinek gehiago iraun film laburra ere emango dute. Kimuak film laburren aurtengo katalogoko bederatzi lan emango ditu Zinemirak, eta horietatik bat da Murorena.
