Bigarren aukeren lurraldea

Akaso Doppelgängers hitza entzun ez, baina segur aski horren inguruan pentsatu bai. Kontzeptu horren atzean uste zabaldu bat dago: horren arabera, unibertsoan nonbait beti omen da gure itxura osoa duen beste pertsona bat; gure doble bat, alegia. Ez gure antza duen norbait, baizik eta gure iguala den beste pertsona bat.

Abiapuntu horretatik tiraka egin du Mike Cahillek lehen film luzea. Uste horren inguruan beste pauso bat eman eta beste Lur bat asmatu du zuzendariak; bigarren aukeren Lurra litzateke hori. Hortik dator pelikularen izenburua: Another Earth, fisika eta zientzia fikzioaren arteko uztarketa iradokitzailea.

Rhoda Williams etorkizun handiko astrofisiko bat da. Haren ametsa unibertsoa goitik behera ikertzea da. Halako batean, planeta misteriotsu bat agertuko da. Lurraren igual-iguala da, eta Lurra 2 izena jarriko diote behin-behinean. Ikerlarien arabera, planeta berri horrek gauzak beste modu batez egiteko aukera ematen du; nolabait, bigarren aukeren lurraldea da.

Hori jakinik eta gertatuko zaion ezbehar larri bati buelta eman nahian, Rhodak planeta horretan ikusiko du irtenbide bakarra. Baina horretarako iraganarekin dituen zorrak kitatu beharko ditu. Pertsona bat ezagutuko du: John Burroughs izeneko musikagile ospetsua. Bien bideak elkartuko dira eta harreman arriskutsua hasiko dute. Handik gutxira Rhodak planeta misteriotsura bidaiatzeko aukera izanen du.

Orain dela gutxi arte National Geographicen egiten zuen lan Mike Canhillek. Brit Marling ezagutu zuen arte, elkarrekin AEBen eta Kubaren arteko harremanen inguruko dokumental bat egin zuten: Boxers and Ballerinas. Honakoa da haien bigarren elkarlana, lehena fikzioaren arloan. Canhillek zuzendu du filma eta gidoia idatzi, Mar- lingekin batera. Azken hori filmeko protagonistetako bat ere bada.

Another Earth-ek oso harrera ona izan zuen Sundanceko aurtengo zinemaldian. Horrez gain, Brit Marlingek emakumezko onenaren saria irabazi berri du Sitgesko zinemaldian.

'ANOTHER EARTH'

Zuzendaria: Mike Cahill.

Aktoreak: Brit Marling, William Mapother, Jordan Baker, Flint Beverage, Robin Taylor.

Herrialdea: AEB.

Urtea: 2011.

Iraupena: 92 minutu.

Ostiralean estreinatuko dute Hego Euskal Herrian.