IMANOL MURUA
(Kazetaria eta idazlea)
Ez konparatu argazkiko harresia Jerusalem zaharra inguratzen duen harresi ederrarekin. Ateak baititu hiri saindu bezain madarikatua inguratzen duen harresiak. Jaffa atea, Damascus atea, Lehoien atea, Urrezko atea. Sartzeko ateak, irteteko ateak. Israeldarrak Zisjordanian egiten ari diren harresiak, aldiz, ez du aterik. Kartzeletako harresiak bezala, hormigoia du, sentsore elektrikoak ditu, arantzadun alanbreak ditu, zanga zuloa du, baina ez du irteerarik, ez du sarrerarik. Berlinen, ordea, badakite aterik gabeko harresiak zertarako eraikitzen diren: eraitsiak izateko.
JON MAIA
(Bertsolaria)
Palestina, basa, hitsa
kolonoa, giza sitsa
non zauritu, nola pitza
zure etxean dabiltza
kanporatua izan den horrek
itzultzea du baldintza
errespetatzen ez badizute
zure izatea, hitza
zarrailtzat duzu duintasuna
ondare bakar, bizitza
borrokatzea da zure lurra
berreskuratzeko giltza.
AMETS ARZALLUS
(Bertsolaria eta kazetaria)
Lur sakratuen sekretu hori korapilo denen hari errotuago ditu sustraiak olibondoak lurrari. Libre ibili behar lukeena, arnasa bezain errari, zeinek eraiki nahi izan dio pareta bat haizeari?
