612 euro instituzioek behartsuenei hilero ematen dieten kopurua da, sanfrantziskotar askoren esperantza bizirik irauteko. Testuinguru horretan kokatu du Arretxek nobela berria, eta istorioko protagonista nagusia, Toure, auzoko detektibe berezia da. 19 Kamera sagako lehen nobelak "harrera oso ona" izan du irakurleen artean, idazleak berak eta Iñaki Aldekoa Ereineko editoreak azaldu dutenez. Bigarren nobela honen ostean gehiago etorriko direla aurreratu du Arretxek.
Bolada txar bat igarotzen ari den unean ustezko anaia baten bisita jasoko du Tourek San Frantziskoko bere patera etxean. Lekua egingo dio afrikar abegiaren izenean, eta, erabaki horren erruz, arazo larriak sortuko zaizkio, lapurreta, droga-trafiko eta hilketa kasuetan belarrietaraino nahastuko dutenak. Errealitatea "gordina izan arren", umorea da oraingoan nobelaren sustengu nagusienetakoa idazlearen hitzetan.
Sagako lehen nobela San Frantzsiko auzoan bertan idatzi zuen Arretxek. Eta halaxe egin du bigarren hau ere, adiskide batek utzitako etxebizitza batean, hain zuzen ere: "Pertsonaia asko errealitatean oinarriturik daude. San Frantziskon bizi izan naiz. Poteo kuadrilla ere egin dut, eta gauza asko ikas daiteke bertan izanik".
Euskarazko liburuarekin batera, gaztelaniazko bertsioa ere kaleratu du Arretxek. Itzultzailea Cristina Fernandez izan da.
