Clermont-Ferrand jaialdiko film laburrak emango dituzte Donostian

Duela lau urte hasitako bideari jarraituz, aurten ere Clermont-Ferrand zinema jaialdiko film labur esperimentalak emango dituzte Tabakalerak eta Donostia Kulturak Labo zikloaren barruan. Guztira, 40 film emango dituzte, bost saiotan, atzo hasi eta larunbata bitartean. Donostiako Antzoki Zaharrean izango dira saioak, 20:00etan hasita.

Aurtengoa 33. ekitaldia izan du Clermont-Ferrand zinema jaialdiak, otsailaren 4an hasi eta 12ra arte. Guy Maddinen Night Major-ek (Kanada) jaso du sari nagusia. Antzoki Zaharrean biharko saioan emango dute lan hori.

Epaimahaiaren sari berezia Tao Guren One Way to the Sea-rentzat (Kanada-Txina) izan da. Lan hori Labo zikloko larunbateko saioan emango dute Donostian. Egun berean emango dute prentsako epaimahaiaren aipamena jaso duen lana ere, Jonathan Caouette-ren All Flowres in Time (Quebec).

Gaurko saioan emango dituzten lanen artean, prentsaren Telerama saria eta epaimahaiaren aipamen berezia jaso dituen lana dago, Michael Please-ren The Eagleman Stag (Ingalaterra). Etziko saiokoen artean, berriz, Bluren Big Bang Big Boom (Italia), ikusleen saria jaso duen lana.

Mahai-ingurua eta erakusketa

Larunbatean, proiekzioen aurretik, 18:00etan hasita, mahai-ingurua egingo da Antzoki Zaharrean. Hiru aditu mintzatuko dira film labur eta esperimentalez, Koldo Almandoz moderatzaile dutela: Gerard Cairaschi, Magia film laburraren egilea; Iñigo Salaberria zinemagilea; eta Xavier Fayet Clermont-Ferrand zinema jaialdiko Labo saileko hautaketa batzordeko kidea.

Film laburren emanaldien osagarri gisa, Anatomie du Labo 4 erakusketa dago ikusgai, hilaren 27ra arte, Donostiako Udal Liburutegikoekitaldi aretoan. Lud Chat Labo saileko hautaketa batzordeko kideak jaialdiko filmen errepaso pertsonala egin du erakusketa hori taxutzeko.