Dastatu gure dantza ikuskizuna prestatzeko lanetan ari da Verdini dantza taldea, eta gaur, Elbarritasunaren Nazioarteko Eguna dela eta, entsegu irekia egingo dute, iluntzean. Goizean egin duten ekitaldian azaldu dute 21 urte lanean diharduten arren oraindik beren jarduna “ez dutela kulturatzat” jotzen: “Euskal Herriko kulturaren subjektu eragingor sentitzen da Verdini, eta zenbait sektoreren ulertu ezinaren eta intolerantziaren aurrean, jarraitzen dugu eta jarraituko dugu hemen gaudela aldarrikatzen”. 20:00etan hasita egingo duten entsegu irekiarekin egiten duten lanaren balioa aldarrikatu nahi dutela azaldu dute.
Euskararen Nazioarteko Egunari ere egin diote erreferentzia, eta gogoratu dute taldearen ikuskizunen izenak eta erabiltzen duten musika euskarazkoak direla. “Elbarritasuna duten pertsonekin bezala, euskararen alde ere urteko 365 egunetan lan egin behar du gizarte osoak”, gaineratu du Isabel Verdini taldeko koreografoak.
