Dele Sosimi

Musika beltzen nahasketa dotore eta irudimentsua eskaintzen du Dele Sosimi nigeriarraren bakarkako seigarren diskoak. Sam Duckworth ingelesarekin batera osatutako lanak maisutasunez eramango gaitu funk, jazz, soul eta afrobeat musikek bat egiten duten esparrura. Ez da harritzekoa, Sosimik afrobeatari ezinbesteko ekarpena egin baitio; Fela Kutiren laguntzaile eta Egypt 80 taldeko sortzaile izan zen, eta haren seme Femirekin ere lanean aritu zen. Horrek ematen du lanaren tamaina, nahiz eta garai basatietako indarra sofistikazioz jantzita ageri. Bikaina.