Euskal Herria Zuzenean jaialdia babesteko, kontzertu bat antolatu dute gaurko Hazparneko Ttattola gaztetxean. 22:00etan hasiko da, eta bertan izango dira Zoo eta Kuartz taldeak.
Bertan behera geratu da gaur hastekoa zen EHZ festibala. Antolatzaileek sare sozialetan eman dute albistea, "pena handiarekin". 15:00etan agerraldia egin dute, Lekorneko (Lapurdi) Garroa gazteluan, erabakia hartzeko arrazoiak jakinarazteko. Bideoa: prentsaurrekoa, osorik (Kanaldude).
Azken egunetako eguraldi kaskarra eta datozen egunetarako iragarritakoa kontuan hartuta, teknikariekin eta aseguru etxearekin bildu dira jaialdiko antolatzaileak, eta ondorioztatu dute ezin zutela artisten, jaialdiaren beraren eta laguntzaileen segurtasuna bermatu. Hortaz, jaialdia bertan behera uztea erabaki dute. Edonola, eskerrak eman dizkiete ehunka laguntzaileei eta crowfounding bidez ekarpenak egin zituztenei.
"Eta orain, zer?", galdetu dute. Horri erantzutea "denon ardura" delakoan, gogorarazi dute festibalaren geroaren inguruan gogoeta abiatu dutela eta horretan ariko direla aitzinean. Hala ere, azpimarratu dute elkarteak aitzina segitu behar duela, eta laguntza eskatu dute; nabarmendu dute "elkartasun erauntsia" beharko dutela aurrerantzean: "Auzolanean eraikitako proiektu honek nehoiz baino beharrezkoago du Euskal Herri osoaren elkartasuna".
Kontu korronte zenbaki bat zabaldu dute horretarako: FR76 4255 9000 4421 0292 5040 639. BIC zenbakia, berriz, honakoa: CCOPFRPPXXX.
Auzolana oinarri, 22. urtez zen egitekoa jaialdia, gaur hasi eta igandera bitarte, Lekornen. Urte osoan jardun dute lanean antolatzaileek, eta hamar egunez muntaketa lanetan aritu dira laguntzaile ugari.
Azken garaiotan, ekonomikoki urte zailak bizi izan ditu jaialdiak; 2014an izandako ekaitzak kalteak eragin zituen, eta zorra pilatua zuen. Hala ere, eskaintza oparoa zuen prest hiru egunetarako. Musikaz harago, eztabaidak, antzerkia, dantza eta beste hainbat jarduera ziren egitekoak, eta tokiko elikadurak ere leku garrantzitsua izango zuen, urtero moduan.
Erabaki gogorra hartu behar izan dute, hortaz, antolatzaileek. Sare sozialetan elkartasun mezu ugari ari dira jasotzen.
