Azken hilabeteetan izandako negoziazioa itxitzat eman dute Donostia 2016 eta Kontseiluak. Europako Hizkuntza Aniztasunaren Goi Bilera antolatzeko 2014ko abenduan sinatutako hitzarmena egokitzeko baldintza berriak berretsi dituzte. Kontseilua Hizkuntza Eskubideak bermatzeko Protokoloaz arduratuko da. Protokoloa 2016ko abenduan Kursaal jauregian egitekoa den Europako Hizkuntza Aniztasunaren Goi Bileran aurkeztuko da. Goi Bilera diseinatzeko hainbat erakundez osatutako batzorde antolatzaile bat eratuko da.
Hizkuntza Eskubideak bermatzeko Protokoloa, instituzioen babesarekin, gizarte zibiletik gidatutako prozesu baten emaitza izango da. Datozen egunetan jendaurrean aurkeztuko den batzorde zientifiko bat arduratuko da protokoloa idazteaz. Batzordea Europako hainbat adituk osatuko dute eta euren artean landutako protokoloak pertsona ororen hizkuntza eskubideak bermatzeko bete beharreko neurriak proposatuko ditu.
Donostia 2016k eta Kontseiluak nabarmendu nahi izan dute "jarrera irekia eta eskuzabaltasuna" nagusi izan direla bide horretan, hain zuzen ere, proiektu honek eta bere ekarpenak duen garrantziagatik. Halaber, bi aldeek proiektua "arrakastatsua izan dadin" konpromiso osoa adierazten dute. "Hain zuzen ere, Donostia 2016, Europako Kultur Hiriburua, hizkuntza aniztasunaren sustapenean eta herritar ororen eskubideen babesean mugarri garrantzitsua izan dadin erantzukizunez jokatu nahi izan dute". Proiektuaren moldaketa abenduan zehar jasoko dute ofizialki bi erakundeek, bakoitzaren organo gorenen epeei jarraiki.
