Euskal Herria, Galizia eta Katalunia poesiak batuko ditu Gasteizen

Euskal Herriko, Galiziako eta Kataluniako kulturen elkargune izango da gaur Gasteizko EHUko Letren Fakultateko areto nagusia. Hiru herrialdeetako hainbat eragilek poesia errezitaldia eskainiko dute 18:00etan, Tradizioaren eta modernitatearen arteko bide elkarketak saioan. Euskal Herritik Maialen Lujanbiok parte hartuko du; Galiziatik, Maria Ladok eta Lucia Aldaok; eta Kataluniatik, Josep Pedralsek. Banakako zein taldekako errezitaldiak izango dira emanaldian. Poesia bizitzeko bideak ezagutzeko asmoarekin antolatu dute saioa, baita «belaunaldi baten eta lurralde desberdinen ezaugarri komunak ezagutzeko ere».