Donostiako Zinemaldiko Sail Ofizialak izan ohi dituen zazpi epaimahaikideei, zortzigarren bat gehituko zaie aurten: Oleg Sentsov. Zinemagile ukrainarra joan den maiatzaren 10ean atxilotu zuen Errusiako Federazioko Segurtasun Zerbitzu Federalak (FSB, eta oraindik preso dago, Moskun. Euromaidan taldeak Kieven egindako protestak babestu zituen Sentsovek eta Errusiak Krimea anexionatzearen kontra agertu da.
Fernando Bovaira (1963) zinema ekoizle kataluniarra izango da epaimahai ofizialaren burua. Hainbat film ezagun eta arrakastatsuren arduraduna da Bovaira: Alejandro Amenabarren Los otros (2001) eta Mar adentro (2004), Javier Fesserren La Gran Aventura de Mortadelo y Filemón (2003), Julio Medemen Lucía y el sexo (2001) eta Josa Luis Cuerdaren La lengua de las mariposas (1999) filmeena, besteak beste.
Eric Khoo Singapurreko zinema zuzendariak, Mariana Rondon zinemagile venezuelarrak —iaz Urrezko Maskorra irabazi zuen Pelo malo filmarekin—, Nastassja Kinski aktoreak, Marjane Satrapi komikigile eta zinemagileak, Reinhold Vorschneider argazki zuzendari alemaniarrak eta Vlad Ivanov aktore errumaniarrak osatuko dute epaimahai ofiziala.
