Frederik Wiseman dokumentalgile estatubatuarrak Bilboko Zinebi zinema dokumentalaren eta film laburren zinemaldiko protagonista nagusietakoa izan behar zuen bihar, jaialdiaren lehen egunean. Izan ere, egindako ibilbidea aitortzeko, Ohorezko Mikeldi saria eman behar zion Zinebik. Gaur antolatzaileek jakinarazi dutenez, ordea, Wiseman ez da etorriko Bilbora, osasun arazo batzuk tarteko Bostongo (AEB) erietxe batean ospitaleratu behar izan baitute. Nolanahi ere, saria igorriko diotela jakinarazi dute.
Wiseman (Boston, 1930) AEBetako dokumentalgintzaren aitzindari eta ordezkari garrantzitsuenetakoa da, eta haren azkeneko lanen artean daude National Gallery (2014) eta Ex-libris (2017) film laudatuak.