Iraganeko, egungo eta etorkizuneko hondamendietan girotutako hemeretzi ipuin batzen ditu Xabier Montoiaren Hondamendia narrazio bildumak (Elkar). Hiru zatitan banatuta dago, hain zuzen ere, liburua: lehenengoan, behialako hondamendiak kontatzen dira, Adam eta Ebaren gorabehera batzuetatik hasita; bigarrengoan, egungoak; hirugarrengoan, etorkizunekoak.
Montoiak liburua aurkeztean azaldu duenez, Erromara musikari moduan kontzertu bat ematera joana zelarik Vatikanoa bisitatu zuenean bururatu zitzaion liburuko ipuinetako bat, Terrorista. Hura izan zen, liburuko guztien artean, idatzi zuen lehena.
Gainerako ipuinetan ere, aldez edo moldez, hondamendiaren gaia agertzen da. Egungo munduan “hondamendiaren sentsazioa” nagusitzen dela uste du Montoiak, baina azken batean sentsazio hori izan dela aurreko garaietan ere, eta ondorengoetan ere ez dela desagertuko, sentsazio hori “espezieari” atxikita dagoelako.
Nolanahi ere, Montoiak ez du bere burua ezkortzat, errealistatzat baizik.
