Galder Gaztelu-Urrutia (Bilbo, 1974) zinemagilearen lehen film luzea da El hoyo (Zuloa), eta Sitgeseko Zinema Fantastikoaren Jaialdiko sari nagusia jaso du: film onenari emandakoa. Horrez gain, efektu berezi onenen saria eta publikoaren saria ere jaso ditu; eta Gaztelu-Urrutiari zuzendari berri onenaren Citizen Kane saria eman diote.
Giizarteren parabola bat da El hoyo: hainbat pertsona egitura bertikal batean daude preso, solairuko bi; zulo bat dago egitura horren erdigunean, eta hormigoizko plataforma bat jaisten da egunero zulotik, janariarekin; zenbat eta beherago solairua, orduan eta janari gutxiago dago presoen artean banatzeko. David Desolak eta Pedro Riverok idatzi dute gidoia, eta Ivan Massague, Antonia San Juan, Zorion Egileor, Emilio Buale eta Alexandra Masangkay dira protagonistak.
Sitgesekoa (Bartzelona, Herrialde Katalanak) ez da El hoyo-k jaso duen lehen saria. Torontoko zinemaldiko Midnight Madness saileko Publikoaren saria lortu zuen irailean. Gaur hamabost, film horren proiekzioarekin inauguratuko dute Donostiako Fantasiazko eta Beldurrezko Zinemaren 30. Astea.
