'Gizona eta kidea'

GIZONA: Zeinek kondenatu nau hiltzera?

KIDEA: Auzitegi Nagusiak.

GIZONA: Zer dela-eta?

KIDEA: Gizon bat hila izan delako.

GIZONA: Zer ikusi behar dut gizon horrekin. Ez dut nik hil.

KIDEA: Nik hil dut ordea.

GIZONA: Hiltzailea al zara?

KIDEA: Bai, hiltzailea nauzu.

GIZONA: Zu ere hil behar zaituzte orduan.

KIDEA: Ez, Auzitegi Nagusiak erabaki du zuri dagokizula nere errua ordaintzea eta zuk hil behar duzula nere ordez.

GIZONA: Oker bat da hori.

KIDEA: Auzitegi Nagusiak ez du okerrik egiten.

GIZONA: Ni errugabea nauzu.

KIDEA: Honela mintzatuaz ezagun da ez duzula nere aurpegirik ikusi. Aurrean duzun nere aurpegia. Argia hartuta mahai gainean jarriko dizut distiraz ager betea natzaizun.

GIZONA: Ene jainkoa!

KIDEA: Ez duzu ikaratu behar.

GIZONA: Nere burua ikusten dut. Nere aurpegia eta gorputza bera.

KIDEA: Ni zure Kidea naiz.

ANTZERKIA (ZATIA)

Jatorrizkoa: alemanieraz.

Itzulpena: Antonio M. Labaien, Egan, 1/3-1963 alean.

Aurkezpena: Urtarrilaren 5ean jaio zen, 1921ean, Suitzan, eta mundu ikuskera etsia ageri dute haren antzezlanek.