"Gogoeta zipriztinekin" 'Ertzeko zatiak' liburua osatu du Jon Sarasuak

Argitaratzeko asmorik gabe sorturiko testuak ziren hasiera batean, “lankideentzat” idatzitako “gogoeta zipriztinak”, baina "jendearen feedback-a sentitu" ondoren liburu batean biltzea otu zitzaion Jon Sarasuari (Aretxabaleta, 1966). Azken sei urteetan Hego hemisferiora egindako lan bidaietan idatzitako testu laburren bilduma da Ertzeko zatiak. Argia aldizkariarekin argitaratu du gehienez ere orri beteko testuak jasotzen dituen lana.

2000tik aurrera, arlo publikoena alboratu eta gai sozio-ekonomikoetan egin du lan Sarasuak, Mondragon Unibertsitatean. Jardun horren adarretako bat Hego hemisferioko herrialde pobretuekin esperientziak partekatzea izan da. Brasil, Ekuador, Bolivia eta beste zenbait lekutan izan da azken urteetan, eta han bildutako eseperientziak ekarri ditu liburura, gogoeta labur modura. Batez ere, autoeraketaren inguruko pentsamenduak eta Brasilgo Lurrik Gabeko Mugimenduarekiko “lilura” ageri dira, egilearen hitzetan.