Hamabi izendapen jaso ditu 'The King's Speech'-ek

Iragarpenek The King's Speech-en eta The Social Network-en artean lehia estua izango zela aurreratu zuten, eta asmatu egin zuten, baina ez erabat. Tom Hooperrek zuzendutako filmak Oscar sarietarako inork baino izendapen gehiago jaso ditu, hamabi, eta David Fincherrenak zortzi, baina bien artean ezusteko gonbidatu bat sartu da: True Grit. Joel eta Ethan Coen anaien western horrek hamar izendapen bildu ditu. Christopher Nolanen Inception-ek ere zortzi izendapen jaso ditu, baina horien artean ez dago zuzendari onenarena. Sariak otsailaren 27an banatuko dituzte.­

Lau horiek pelikula onenaren sarirako hamar hautagaien artean daude, espero zitekeenez. Gainontzekoetan ere ez da ustekaberik izan, eta horien artean Winter's Bone dago, iaz Sundance jaialdian saritutako film independentea. Pelikulako protagonistak, Jennifer Lawrencek, emakumezko aktore onenaren sarirako hautagaitza lortu du. Hori da aktore nagusien ataletan izendatutakoen artean izen berri bakanetakoa, gainerakoak ohikoak baitira Oscarretan: Annette Bening, Nicole Kidman, Natalie Portman, Javier Bardem, Jeff Bridges, Colin Firth...

Ingelesez besteko filmen atalean, aipatzekoa da Alejandro Gonzalez Iñarrituk hirugarren izendapena lortu izana Biutiful-ekin. In a Better World, Dogtooth eta Hors la loi ere aipatzen zituzten faboritoen artean, baina Incendies ez zen kiniela askotan agertzen.

Bigarren mailako aktoreetan, hauek dira hautagaiak emakumezkoen atalean: Amy Adams (The Fighter), Helena Bonham Carter (The King's Speech), Melissa Leo (The Fighter), Hailee Steinfeld (True Grit) eta Jacki Weaver (Animal Kingdom). Gizonezkoen atalean, Christian Bale (The Fighter), John Hawkes (Winter's Bone), Jeremy Renner (The Town), Mark Ruffalo (The Kids Are All Right) eta Geoffrey Rush (The King's Speech) dira hautagaiak.

Dokumentalen atalean, Banksy artistaren Exit Through the Gift Shop, Restrepo, Gasland, Inside Job eta Waste Land izendatu dituzte, eta animaziozko film onenaren atalean How to Train Your Dragon, The Illusionist eta Toy Story 3.