Herta Muller idazle errumaniar eta 2009ko Nobel saridunak Cecilia Dreymullerekin izango duen solasaldiarekin hasiko da gaur iluntzean (20:00) Gutun Zuria, Letren Bilboko Jaialdia. Aurretik, Matxalen Bilbao dantzariak Self ikuskizuna eskainiko du Alondegian, literatur topaketa guztiak egingo diren gunean.
Gutun Zuria jaialdia egingo den zazpigarren aldia da aurtengoa, eta antolatzaileek izen handiko egileak biltzen dituen egitaraua prestatu dute, guztiek ere Mugako kontakizunak gaiaren inguruan hitz egin dezaten. Mullerrez gain, beste bi Nobel saridun izango dira jaialdian: Gao Xingjian txinatarra —2000. urtean eman zioten Suediako Akademiako saria— eta Orhan Pamuk turkiarra (2006). Eta horiekin batera, atzerriko beste bi idazle ezagunek ere hartuko dute parte Gutun Zurian, Claudio Magris italiarrak eta Juan Goytisolo kataluniarrak. Guztiek hitz egingo dute "erregimen totalitarioen kartzela fisiko eta buru barrukoez, eta baita biztanleria mugimenduez ere". Juan Goytisolo, adibidez, erlijioen arteko gatazkez eta kulturen arteko talkaz ariko da, eta Lydia Cachok nahiz Sergio Gonzalez Rodriguezek Mexikoko mugetan emakumeen kontrako indarkeria nola bizi duten kontatuko dute.
Euskal idazleak ere izango dira Gutun Zurian. Larunbatean Txomin Peillen Arantxa Iturberekin ariko da solasean, eta egun berean, Iñaki Mendizabalek Kirmen Uribe eta Mikel Urdangarin elkarrizketatuko ditu. Apirilaren 4an, bestalde, Ramon Saizarbitoria izango da Gutun Zuriaren protagonista. Martutene-ren egilearekin ariko da hizketan Arantxa Urretabizkaia.
Gutun Zuria apirilaren 6ra arte egin da. Hemen dago egitaraua ikusgai.
