Donostiako Maria Kristina zubian dagoeneko ari dira larunbateko ekitaldirako tresneria guztia antolatzen. Ikuskizun handia izango dela azaldu du Hansel Cerezak, La Fura dels Baus-eko sortzaile izandakoak. Hark diseinatu du ekitaldia, eta hiriburutzaren balioak islatuko dituela azaldu du. Xehetasun handirik ez du eman nahi izan, baina herritarren parte hartzea eta Mikel Laboaren Baga, Biga, Higa kantua funtsezko osagaiak izango direla aurreratu du, eta "eduki emozionalari" eman dio garrantzia. "Helburua donostiarrek beren ekitaldia egitea izan da".
Ia mila lagun ari dira ekitaldirako entseguetan parte hartzen, eta beste 300 bat boluntario ariko dira egunean bertan laguntzen. Publikoa bera protagonista izango dela nabarmendu dute antolatzaileek. Zubian eta inguruetan 50.000 lagun inguru biltzea aurreikusten dute. Beste horrenbeste eskuorri banatuko dituzte, Laboaren abestiaren hitzekin, jendeak kanta dezan. Inguruko pasealekuetan pantaila erraldoiak jarriko dituzte, baina ikuskizuna Mundaiz eta Santa Katalina zubietatik zein ibaiertzetatik ikusi ahal izango dela azaldu dute.
