Hispanoen ahotsa AEBetan

Amerikako Estatu Batuetara joandako kubatarren semea zen Oscar Hijuelos. 1951n New Yorken jaioa; hantxe hil zen joan den larunbatean, 62 urterekin, tenisean jolasean ari zela. Lan guztiak ingelesez idatzi zituen arren, komunitate hispanoari buruzko gaiak lantzen zituen. Lan esanguratsuenak,The Mambo Kings Play Songs of Love (1989) eleberriak, fikziozko lanari Pulitzer literatur saria irabazi zuen 1990ean. 50eko hamarkadako New Yorken musika latinoak izan zuen zabalkundea islatzen du eleberriak, eta arrakasta handia lortu zuen. Eleberria 30 hizkuntzatara itzulita dago; film bat eta musikal bat ere ekoitzi dute hura oinarri hartuta.

AEBetako literatura hispanoaren erreferentea izan zen idazlearen azken lana Thoughts Without Cigarettes: A Memoir (2011) memoria liburua izan zen.