Arrakasta, produkzio kostuak eta lanen kalitatea kontuan hartuta, aditu askorentzat telesailak zinema onenaren pare jarri dira azken urteetan. Bart gauean ospatu ziren New Yorken AEBetako telesail onenak izendatzen dituen Emmy sariak. Iragarpen guztiak iraulita, Homeland telesailak lau sari irabazi zituen: dramazko telesail onena, emakumezko eta gizonezko aktore protagonista onenak eta gidoi onena. Showtime katean ematen dute telesaila.
Galtzailea Mad Men telesaila izan zen, azkeneko lau urteetako irabazle postua galdu baitzuen, eta horrela, historiako dramazko telesail sarituena izatetik pauso batera geratu da. Ikus-entzuleen artean izandako arrakasta ikusita, emaitza onak espero ziren Downton Abbey telesailarentzat ere, baina sari bakarrarekin geratu zen: Maggie Smithek emakumezko bigarren mailako aktore onena izendatu zuten.
Ez zen ezusterik izan, aldiz, komediazko telesailei dagokionez eta Modern Family telesaila izan zen garaile; azkeneko bi urteetako arrakastari jarraiki.
Sari nagusietako irabazleen zerrenda:
- Dramazko telesail onena: Homeland.
- Komediazko telesail onena: Modern Family.
- Dramazko gizonezko aktore onena: Damian Lewis, Homeland.
- Dramazko emakumezko aktore onena: Claire Danes, Homeland.
- Komediazko gizonezko aktore onena: Jon Cryer, Two and a Half Men.
- Komediazko emakumezko aktore onena: Julia Louis-Dreyfus, Veep.
- Dramazko bigarren mailako gizonezko aktore onena: Aaron Paul, Breaking Bad.
- Dramazko bigarren mailako emakumezko aktore onena: Maggie Smith, Downton Abbey.
- Komediazko bigarren mailako gizonezko aktore onena: Eric Stonestreet, Modern Family.
- Komediazko bigarren mailako emakumezko aktore onena: Julie Bowen, Modern Family.
- Telesail labur onena: Game Change, Jay Roach zuzendariarena.
- Telesail laburretako gizonezko aktore onena: Kevin Costner, Hatfields and McCoys.
- Telesail laburretako emakumezko aktore onena: Julianne Moore, Game Change.
- Telesai laburretako bigarren mailako gizonezko aktore onena: Tom Berenger, Hatfields and McCoys.
- Telesai laburretako bigarren mailako emakumezko aktore onena: Jessica Lange, American Horror Story.
- Gaueko saio onena: Jon Stewartek gidatutako, The Daily Show.
- Reality onena: The Amazing Race.
