Illunben jokatuko dute aurten Gipuzkoako Bertsolari Txapelketako finala

Irailaren 22an hasiko da aurtengo Gipuzkoako Bertsolari Txapelketa, Orion, eta abenduaren 16an bukatuko, Donostian Hain zuzen, Illunbe zezen-plazan izango da finala, lehen aldiz, 17:00etan hasita. Halaxe jakinarazi dute gaur antolatzaileek, aurkezpenean. G puntua izango du leloa txapelketak.

79 bertsolari ariko dira, eta haien artean ez da izango Maialen Lujanbio egungo txapelduna. Bai 2003ko finaleko beste zazpi lagunak: Jexux Mari Irazu, Iñaki Gurrutxaga, Ekaitz Goikoetxea, Aitor Mendiluze, Jon Maia, Jon Martin eta Amaia Agirre. Hauek, gainera, final-laurdenetan sartuko dira txapelketan.

Finalaurrekoak Eskoriatzan (azaroaren 17an), Oiartzunen (azaroaren 24an) eta Ordizian (abenduaren 1ean) jokatuko dituzte, 18:00etatik aurrera. Final-laurdenak, Azkoitian, Irunen, Eibarren, Zumaian eta Tolosan. Lehendabizi, sailkapen fasea, Orion ez ezik, Legazpin, Hernanin, Zaldibian, Usurbilen, Zumarraga-Urretxun, Ataunen, Getarian, Elgetan, Errenterian, Arrasaten eta Hondarribian.

Hemeretzi lagun ariko dira epaile, eta zazpi gai-jartzaile. Antolatzaileek esan dutenez, aurtengo txapelketa "inoiz baino anitzagoa" izango da.