Three Billboards Outside Ebbing, Missouri filma izan da aurtengo Urrezko Globoetako garaile nagusia, lau sari eskuratuta, tartean film eta aktore onenarena, azken hori Frances McDormandentzat. Ordea, gaueko protagonista beste bat izan da.
Beltzez jantzita agertu dira Hollywoodeko izarrak bat gaueko jaialdira. Helburua azken hilabeteetan hainbat emakumezko aktorek salatutako jazarpena lehen lerrora ekartzea izan da. Ohorezko saria jaso duen Oprah Winfrey telebista aurkezleak ohartarazi du amaitua dela urte luzez "munduan agindu duten gizon anker eta boteretsuen garaia".
Winfrey ez da bakarra izan. Film dramatiko onenaren saria iragartzeko hitzaldian, Barbra Streisandek gogorarazi du bera dela zuzendari onenaren Urrezko Globoa jaso duen emakumezko bakarra —1984an izan zen hori, Yentl filmarengatik—. Hain zuzen ere, aurten beste gizonezko batek eskuratu du zuzendari onenaren saria, Guillermo del Torok, The Shape of Water lanarengatik.
Sarituen artean izan da Nicole Kidman ere, Big Little Lies telesailarengatik. Kidmanek berak ere gizartea aldatu beharra nabarmendu zuen saria jasotzean.
