«Inoiz antzerkirik idatzi ez banu bezala sentitzen naiz»

Garai batean antzerki idazle oparoa izana bada ere, azkeneko 25 urteetan ez du antzerki obrarik idatzi Daniel Landartek. «Beldur bat sentitzen dut», aitortu zuen. «Ezin sinetsia baldin bada ere, inoiz antzerkirik idatzi ez banu bezala sentitzen naiz, eta berriz idazten hasteko beldurrak itotzen nau». Egungo munduko errealitate asko arrotzak eta ezezagunak zaizkio, eta hori da beldurraren sakoneko motiboetako bat. Ez du etsi, ordea. «Hil aitzin beste obra bat bederen idatzi nahi nuke, hala ere, eta ene plazerik handiena litzateke obra hori profesionalek ematea».