Iragazkiak ere aldatuko dira

Musika industria talde batzuen ibilbidea indartzen ahalegintzen zen. Haiei bultzada bat ematen. «Baina horrek ez du esan nahi bultzada hori taldeen kalitatean oinarritzen zenik», argitu du Etxegoienek. Iraultza digitalaren eraginez, ordea, industria kinka larrian dago, eta beste batzuek egingo dute galbahe lana aurrerantzean.

Barandiaranen ustez, beharbada, animaliekin bezala, «hautespen naturala gertatuko da. Edo kazetari espezializatuek eta erreferentziazko webguneek emango dituzte pistak». Egun, jada, iruditzen zaio modako aldizkariek «edo joerek» egiten dutela galbahe lana. Heras ere uste berekoa da. «Irakurri nahi duenak, zer atera den jakin nahi duenak badaki nora jo. Hori bai, ez dakigu zer gertatuko den publiko zabalarekin...». Etxegoienentzat, azken finean «kalitatea» nagusitu da. «Pitchfork atari digitalean sartzen baldin bazara, eta gehien entzundako abestien zerrendan puntan bazaude, sentsazioa duzu puntan zaudela. Izan ere, Pitchfork eta Mojo paperezko aldizkariaren arteko zerrendetan ez da alde handirik egoten. Ona denak aurrera egingo du». Izagirrek gakoetako bat bota du: «Oihan honetan saiatu behar dugu irudimena muturrera eramaten eta egiten dugunari kolore berezia ematen».