Elkarrizketa da bien sorkuntzarako metodoa. Elkarren konplize dira biak, eta elkarrekin sortzaile. Itziar Okariz eta Jon Mikel Euba dira. Euskal arte garaikideak duen sortzailerik entzutetsuenetariko bat egun Itziar Okarizena. Nazioartean oihartzun handiena duen euskal sortzaileetariko bat da Jon Mikel Euba.
EHUko Arte Ederretako Fakultatean ezagutu zuten elkar, baina handik urte batzuetara heldu zen benetako topaketa. Artelekun ikastaro bat egitera joan, eta Okarizen etxean hartu zuen ostatu Eubak. "Artisten etxe bat zen hura", dio. "Sekulako maila zegoen han. Oso solasaldi onak izaten genituen". Biak elkartu ditu BERRIAk Sortzailea eta konplizea udako seriean, eta bihar argitaratuko da haiei buruzko erreportajea.
Gaur argitaratu da serieko lehen alea, Harkaitz Cano eta Gorka Arreseri buruzkoa. Datozen egunotan Koldo Almandoz eta Marian Fernandez Pascal; Ainara Gurrutxaga eta Oier Guillan; Mixel Etxekopar eta Jean-Christian Irigoien; eta Xabier Montoia eta Ibon Rodriguez ere bilduko ditu BERRIAk.
