Jane Eyreren itzulera

Hiru ziren Bronte ahizpak, Anne, Emily eta Charlotte. Azken horrek idatzi zuen Jane Eyre drama erromantikoa, aurretik hainbat bertsio izan dituen istorioa. 1943an, esaterako, Orson Welles izan zen Robert Stevensonek zuzendu zuen filmaren protagonista; 1996an, Franco Zeffirellik berea egin zuen, William Hurt eta Charlotte Gainsbourgekin. Horiez gain, telebistarako hainbat aldiz moldatu izan dute Charlotte Bronteren eleberria.

Orain, Cary Fukunagaren eskutik dator moldaketa. Fukunagak Sin nombre pelikula mexikarra egin zuen orain dela bi urte, eta nahiko harrera ona izan zuen. Orain, erregistroa guztiz aldatu, eta XIX. mendeko Ingalaterran girotuta dagoen drama erromantiko honekin dator. Gidoilari lanak, berriz, Moira Buffinik egin ditu —Stephen Frearsen Tamara Drewe idatzi zuen—.

Jane Eyrek umezurtz etxe batean igaro ditu haurtzaroa eta gaztaroa. Edward Rochester dirudunaren Tornfield Housen hasiko da neskame, baina handik gutxira ihes eginen du. Ezin ditu jabearen hoztasuna eta etxearen giro iluna jasan. Hala ere, ihes egin eta gutxira etxera itzuliko da, eta nagusiak gordetzen duen sekretu ilunaren inguruan gauza gehiago jakin nahiko ditu.

Protagonista lanetan gaur egun puri-purian dauden bi aktore gazte. Batetik, Michael Fassbender, egunotan David Cronenbergen A Dangerous Method pantailetan duena. Bestetik, Mia Wasikowska, Tim Burtonen Alizia izan zena. Nahiko bikote ona egiten omen dute; izan ere, hurrengo urtean beste pelikula batean ikusiko ditugu elkarrekin, Jim Jarmuschen banpiroen proiektuan.

Jane Eyre honekin ez da amaituko Bronte ahizpen aurtengo dosia; hemendik gutxira ailegatuko da aretoetara Emily Bronteren eleberrian oinarritzen den Wuthering Heights-en bertsio berria. Andrea Arnoldek zuzendu du filma.

'JANE EYRE'

Zuzendaria. Cary Fukunaga.

Aktoreak. Mia Wasikowska, Michael Fassbender.

Herrialdea. Erresuma Batua.

Iraupena. 115 minutu.

Estreinaldia. Gaur estreinatuko dute Hego Euskal Herrian.