Jon Kortazarrek jasoko du Lauaxeta saria

Bizkaiko Foru Aldundiak Jon Kortazar idazleari (Mundaka, Bizkaia; 1955) emango dio aurten Lauaxeta saria, euskararen normalizazioaren eta euskal kulturaren alde egindako lanagatik. Abenduaren 2an jasoko du saria.

2006an Estepan Urkiaga Lauaxeta poetaren liburutegiaren berri ematen zuen liburua osatu zuen Kortazarrek berak, haren jaiotzaren lehen mendeurrena gogoratzeko. Lauaxetaren liburuen inbentarioan oinarrituta, haren gustu estetikoen inguruko komentarioak idatzi zituen.

Bi atal nagusitan banatu zuen liburua: literatura arloa eta literaturatik kanpoko alorrak. Lehen atalean, azpi-atal bana dute euskal literaturak, literatura klasikoak, neoklasizismoak, erromantizismoak, sinbolismoak eta modernismoak, besteak beste. Bigarren atalean, pentsamendua, giza auzia, erlijioa, nazionalismoa, euskara eta artea dira azpiatal nagusiak.