1950eko hamarkadatik hasi eta gaur egunera arte egindako ehundik gora lan jarri ditu ikusgai Jose Antonio Sistiagak (Donostia, 1932) bere jaioterrian, Koldo Mitxelena Kulturuneko erakusgela nagusian. Lorategi irudikatu bateko islak erakusketa gaurtik irailaren 24ra bitarte egongo da zabalik.
Margolanak dira ikusgai dauden obra gehienak, gaien arabera hainbat aretotan antolatutakoak: olioak, paper edo kartoi gainean tintarekin egindako irudiak, argizariak... Baina zeluloidearen gainean pelikulak margotzea da artistaren berezitasun nagusietariko bat, eta halako hiru lan ere badira erakusketan, tartean, Ere, Erera baleibu... (1968-1970) filma, kamerarik gabe inoiz egindako luzeena. Haiek digitalizatu ostean, margolanekin batera erakusgai jarri dituzte aretoan.