Miren Jaio epaimahaikideak eta Joxean Muñoz Kultura sailburuordeak eman dute 2014ko Gure Artea sarien berri.
Ibilbide artistikoaren saria Juan Luis Moraza eskultoreari (Gasteiz, 1960) eman dio Kultura Sailak, eta sorkuntzari lotutakoa, berriz, Inazio Escuderori (Bilbo, 1972). Escudero performancearen eta bideoaren esparruetan aritzen da gehien bat. Morazak eta Escuderok 25.000na euro jasoko dituzte.
Artea sustatzeko eginiko lanagatik Otaola beka saritu dute. Artista gazteen lana sustatzeko beka da Otaola, eta Juan eta Pablo Otaola artista basauriarren familliak eman ohi du. 15.000 euroko saria jasoko du.
