Kanpai hotsekin batera ikusteko komedia

Valentine's Day filmak bi sari irabazi zituen: aktore txarrenen bi Razzie sari eskuratu zituzten Ashton Kutcherek eta Jessica Albak. 2010eko ekoizpen horrek San Valentin eguneko hainbat istorio bildu zituen ustezko pelikula batean, Gerry Marshallen zuzendaritzapean. Razziez aparte, nonbait gauzak ez zitzaizkion sobera gaizki joan marketin produktu horri; hori dela eta, hemen da horren ondorena, oraingo honetan Gabonen inguruko collage komertziala.

Gurutzatzen diren istorio sorta bat da New Year's Eve-k proposatzen duena. Ospitalean dagoen adineko gizonezko bat, Gabonak gorroto dituen pertsona erretxina, urtea amaitu aurretik hainbat tratu komertzial itxi nahi dituen negozio-emakumezkoa, antzerki ikuskizun handia gidatzen duen ekoizlea… Istorio horiek guztiak New Yorken gertatuko dira, justu urtea amaitzen ari denean. Argi eta garbi, data «seinalatu» hauetarako prestatutako kontsumo azkarreko pelikula bat da honako hau; bestelako asmorik ez du.

Zinemaren Live Aid balitz bezala, aktore ezagun asko agertuko dira izarren bilduma izan nahi duen New Year's Eve honetan. Zerrenda luzea da: bigarren Razzieren bila doan Asthon Kutcher eta behialako prestigio guztia galtzen ari den Robert de Nirorekin batera, Hillary Swank, Michelle Pfeiffer, Zac Efron, Halle Berry, Sarah Jessica Parker, Sienna Miller, Greg Kinnear… Zerrenda amaigabe horretan, bi musikari ezagun ere agertzen dira: Jon Bon Jovi eta Ice Cube rap kantaria.

Zuzendari lanetan Gerry Marshall Hollywoodeko morroia dago. Enkarguz beteriko filmografia luzea du Marshallek, eta haren meriturik handiena 1990ean Pretty Woman arrakastatsua zuzendu izana da.

'NEW YEAR'S EVE'

Zuzendaria. Garry Marshall.

Aktoreak. Ashton Kutcher, Robert De Niro, Katherine Heigl, Lea Michele, Abigail Breslin, Hilary Swank, Michelle Pfeiffer, Zac Efron.

Herrialdea. AEB.

Iraupena. 118 minutu.

Estreinaldia. Gaur estreinatuko dute Ipar Euskal Herrian, eta ostiralean Hego Euskal Herrian.