Krisia gorabehera publikoak emaniko erantzuna txalotu dute antolatzaileek

Donostiako Musika Hamabostaldiak publikoaren erantzun ona izan du aurten ere. Antolatzaileek ez dituzte eman zenbaki osoak, baina jakinarazi dute milaka lagun bildu direla jaialdiko ekitaldietara —eta 70 saiotik gora izan dira—. Hain zuzen ere, Kursaal auditoriuma %90 bete da, Viktoria Eugenia %100, eta Antzinako Zikloa, berriz, %95. «Krisiaren ondorioz jaialdiak murrizketak izan baditu ere, publikoaren erantzuna txalotu beharrean gaude», adierazi dute ohar bidez antolatzaileek.

Aurtengo ekitaldia amaitu berritan, antolatzaileak dagoeneko hasiak dira hurrengoa prestatzen. Jaialdiaren 74. ekitaldian, besteak beste, Europako Ganbera Orkestra ariko da, eta Robin Ticciati zuzendaria ere izango da Donostian, bere orkestrarekin. Gainera, Txirula magikoa operaren taularatzeak aurten izandako arrakastaren ondotik, antolatzaileek iragarri dute datorren urtean Giuseppe Verdiren lan batek beteko duela genero horrek izango duen tartea.