Kusturicak utzi egin du Urrezko Laranja Turkiako jaialdia, aurkako kritikengatik

Aurka izan du giroa Emir Kusturica zinemagile serbiarrak hasieratik Antalyako (Turkia) Nazioarteko Urrezko Laranja Zinema Jaialdian, eta epaimahaiko kide izateari uko egin dio azkenean. Balkanetako Gerretan izandako bosniar musulmanen hilketak justifikatu izana da serbiarraren aurkariek aurpegiratu diotena.

Eskuin muturreko MHP alderdia izan da protesten buru aritu dena, baina Ertugrul Gunay Kultura ministroak eta aurten Berlinale jaialdian Urrezko Hartza jaso zuen Semih Kaplanoglu zinemagile turkiarrak ere jarrera bera izan dute. Kusturicak parte hartuz gero festibala utziko zuela egin zuen mehatxu Kaplanogluk.

Kusturicak egin du atzera, azkenean, presiogileen kritikak «barbaro eta primitibotzat» jo dituen arren. «Ni beti egon naiz Serbiak Bosnian egindako gizateriaren aurkako krimenen kontra», esan du. Jugoslavia bateratuaren aldeko bere jarrera izan daiteke, zinemagileak iradoki duenez, bere aurkako kritiken arrazoia.