Euskaraz Bizi Nahi Dut film laburren 3. lehiaketak sari gehiago eskainiko ditu aurten. Parte hartu nahi dutenek profesionalen eta amateurren sailen artean aukeratu beharko dute.
Kontseiluak eta Donostiako Zinemaldiak elkarlanean sortutako ekimena da, eta bi helburu ditu; alde batetik, euskarazko filmak sustatzea, eta, bestetik, Euskal Herrian ekoiztutako film laburrei bultzada ematea. Kontseiluaren idazkari nagusi Paul Bilbaoren esanetan, euskaraz bizitzeko bidean lagungarria da zinema: "Zinemaren hizkuntza elkarbizitzarako eta mundua aldatzeko bozgorailua izan daiteke, eta, horregatik, garrantzitsua da guretzat Zinemaldiak eskaini digun aterkia".
Euskara eta zinema lotzeko hainbat ekinbide bultzatzeko asmoa azaldu du Zinemaldiko zuzendari Jose Luis Rebordinosek: "Kontseiluaren proposamena bat dator euskarazko zinema sustatzeko dugun helburuarekin; etorkizunean iragarriko dugun moduan, jaialdiak leku berezia egingo dio euskarazko zinemari".
Sail bakoitzean hiru sari eskainiko dituzte. Profesionalen atalean, lehen saria 2.000 eurokoa izango da, BERRIAk eskainia; bigarrena, 1.000 eurokoa, Zineuskadik eskainia; eta hirugarrena, 500 eurokoa, Hamaika Telebistak emana. Amateurren sailean, berriz, lehen saria, 1.000 eurokoa, Kontseiluak banatuko du; bigarrena, 500 eurokoa, Argia aldizkariak; eta hirugarrena, 250 eurokoa, Central eskolak. Lanak bidaltzeko epea irekita egongo da irailaren 8ra arte.
