Mariasun Landa idazleak eta Jean-Baptiste Orpustan literatur ikerlariak Eusko Ikaskuntza-Laboral Kutxa saria jaso dute gaur arratsaldean Donostian, Miramar jauregian egindako ekitaldi batean. Iñaki Dorronsoro Eusko Ikaskuntzako presidentearen eskutik jaso dute saria.
Eusko Ikaskuntzak eta Laboral Kutxak 1995ean abiatu zuten saria, humanitateen, kulturaren, arteen eta giza zientzien alorretan pertsona bizi batek egindako lana aitortzeko asmoarekin, eta ordudanik, honako hauek jaso dute saria: Julio Caro Baroja, Alvaro d'Ors Pérez Peix, Luis Villasante Kortabitarte, Jesus Altuna Etxabe eta Juan Plazaola Artola, Eduardo Txillida Juantegi, Miguel Artola Gallego, Juan Garmendia Larrañaga, Bernardo Atxaga, Gurutz Jauregi, Juan San Martin Ortiz de Zarate, Nestor Basterretxea, Maite Lafourcade, Gregorio Monreal, Danniel Innerarity, Javier Elzo, Joxerramon Bengoetxea, Maria Bayo, Joxe Azurmendi Otaegi, Mari Carmen Gallastegi eta Francisco Etxeberria.
Sariek 20.000 euroko balioa dute eta, aurten, iaz bezala, erdibana banatuko dira Landa eta Orpustanen artean.
