Euskal Herriko Eskolarteko Bertsolari Txapelketako finala larunbatean jokatuko da, ekainaren 22an, Orioko Karela kiroldegian, bi saiotan: lehenengoan, 11:00etatik aurrera, gaztetxoek hartuko dute parte, eta bigarrengoan, 15:30etik aurrera, helduek, 15 eta 18 urte bitartekoek.
Gaztetxoen mailan, bost talde lehiatuko dira: Arabako taldea, Ekialdeko taldea (Bizkaia), Zarauzko taldea (Gipuzkoa), Kanbo-Xalbadorreko taldea (Lapurdi-Nafarroa Beherea) eta Leitzako taldea (Nafarroa).
Helduen mailan, berriz, hamar bertsolari lehiatuko dira txapela irabazi nahian: Peru Abarrategi (Aramaio, Araba, 1997), Iñaki Tena (Gasteiz, 1995), Txaber Altube (Abadiño, Bizkaia, 1998), Ander Gerraikaetxebarria (Zornotza, Bizkaia, 1996), Mikel Iturriotz (Urretxu, Gipuzkoa, 1995), Gemma Urteaga (Beasain, Gipuzkoa, 1995), Ortzi Murua (Azkaine, Lapurdi, 1995), Aitor Serviere (Azkaine, Lapurdi, 1995), Mikel Lasarte (Barañain, Nafarroa, 1996) eta Maddalen Lopez (Lesaka, Nafarroa, 1997).
Goizeko nahiz arratsaldeko saioak Xabier Sukiak aurkeztuko ditu. Epaimahaia Ekaitz Elorriaga, Gorka Intxaurbe, Ainhoa Mujika, Jokin Arregi, Beñat Soule eta Mikel Beaumontek osatuko dute.
