Gaur itxi dute Donostiako 59. Zinemaldiaren Urrezko Maskorrerako lehia, Arturo Ripsteinen Las razones del corazón eta Mathieu Demyren Americano filmen emanaldiekin. Americano nahikoa biografikoa dela dio Gontzal Agote BERRIAko zinema adituak, eta lanak "bukaeran behera" egin duela. Las razones del corazón, berriz, film "zaila" dela uste du Agotek, baldin eta pelikula barruan ez sartuz gero; aldiz, sartuz gero, "harrapatu egiten zaitu".
Biharkoa izango du azken eguna jaialdiak, eta iluntzean egingo duten galan jakinaraziko dituzte sarituen izenak. Denera hamasei lan lehiatu dira Urrezko Maskorra irabazteko.
Orain arteko kritikei eta ikusleen harrerari erreparatuta, Hirokazu Kore-eda zuzendari japoniarra izan daiteke sari bat jasotzeko hautagai sendoenetako bat, Kiseki (I Wish) lanari esker. Terence Davies zinemagile ingelesaren The Deep Blue Sea drama izan da kritikarien gustukoenetako bat.
