Legez kanpoko misioak

Erretiroa hartuko duela iragarri, baina oraingoz ez du ematen Steven Soderberghek bere mehatxua beteko duenik. Ohiko erritmo bizian segitzen du lanean, genero batetik bestera askatasun handiz salto eginez. Haywire honetaz aparte, beste bi pelikula ditu zain hurrengo hilabeteotan estreinatzeko: The Side Effects farmakologiaren inguruko thrillerra eta Magic Mike,striper batzuen inguruko komedia.

Baina horiek etorkizunerako planak dira, oraingoa bere film berria du. Iazko Contagion bikainaren ostean, oraingoan zinemagile estatubatuarra espioitza thriller batekin ausartu da, aktore sorta ezagun batek lagunduta. Hor dira, besteak beste, Soderberghen hainbat filmetan parte hartu duen Michael Douglas edota Michael Fassbender, modako aktorea. Eta ez dira zuzendariaren aginduetara lan egin nahi izan duten artista ezagun bakarrak, Haywire honetan Ewan McGregor, Channing Tatum edo Antonio Banderas ere agertzen dira. Protagonista lanetan, berriz, guztiz aktore ezezagun bat dugu: Gina Carano.

Mallory Kanek mundu osoko gobernuek legezkotasunaren barruan egin ezin dituzten operazio arriskutsuak hartzen ditu bere gain. Kenneth du nagusia, eta hark negoziatzen ditu askotan legez kanpo dauden misio arriskutsuak.

Bartzelonan gatibu bat askatu ostean, Kanek Dublinera joan beharko du, lan berri batera. Han, Paul agente dotorearekin elkartuko da. Baina gauzak ez dira espero bezala aterako, norbaitek traizioa egin eta operazioa gaizki aterako da. AEBetara bueltan, bere familia arriskuan dagoela jakinen du, eta, aldi berean, traidorea bilatzen hasiko da.

'HAYWIRE'

Zuzendaria: Steven Soderbergh.

Aktoreak: Gina Carano, Ewan McGregor, Michael Douglas, Channing Tatum, Michael Fassbender, Antonio Banderas.

Herrialdea: AEB.

Urtea: 2011.

Iraupena: 93 minutu.

Estreinaldia: Ostiralean estreinatuko dute Hego Euskal Herrian.